雞蛋又平又有營養，我哋幾乎日日都食㗎喇，但喺清朝，雞蛋竟然變成超奢侈嘅貴價食材，連光緒皇帝都感慨食唔起？光緒年間嘅進士何德剛喺《春明夢錄》度記載，內務府嘅太監同光緒報帳話一隻雞蛋要3兩銀，有一次光緒問老師翁同龢早餐通常食乜，翁同龢就答話係3隻雞蛋。跟住光緒就好感歎，反問翁同龢：3隻雞蛋要9兩銀，老師食得起？

清朝另一本《南亭筆記》嘅版本有啲唔同，講嘅係光緒有一次問翁同龢有無食過雞蛋呢啲咁貴嘅嘢？翁同龢梗係知一隻雞蛋幾錢喇，又唔敢得罪背後得益嘅人，唯有答：我屋企只有喺祭祀大典嗰陣先會偶爾用到雞蛋，平時係絕對唔敢食嘅。既唔得罪人又顧全咗光緒嘅面子，翁同龢認真識講嘢。

兌返依家嘅物價，翁同龢食落肚嘅3隻雞蛋，分分鐘夠一個人去五星級酒店食幾次自助餐！咁計法，普通人真係食唔起雞蛋囉。但究竟點解啲雞蛋去咗光緒面前會貴成咁？試諗吓，一隻雞蛋由養雞人手上去到光緒面前，中間有無數人經手，個個都從中抽利，咁隻蛋就梗係天價喇。

圖為光緒、翁同龢，原圖嚟自網絡。